Shairi: Kilio cha Albino



                   Picha kutoka Yahoo news

Kisa ni mbovu imani, Ndugu zetu mwawaua, [ Amir Kulanteni]
Mwamuabudu shetani, Mmezitupa sheria,
Twapita tu duniani, Kifo chaja kwenu pia,
Kilio cha Albino, Hivi kweli tunajali?

Wenye dhima mwafanyani? Uhai kutulindia,
Wananchi mashakani, Nyie kiguu na njia,
Mara mpo marekani, Sisi huku tunalia,
Kilio cha Albino, Hivi kweli tunajali?

Mwaiba mabilioni, Mwashindwa kututetea,
Ni kama watu usoni, Moyoni mwatumendea,
Ni kama tu hayawani, Imani zimepotea,
Kilio cha Albino, Hivi kweli tunajali?

Vitendo vyangoja nini?, Matamko tu mwatoa,
Ndugu zetu kaburini, Hamuioni kadhia,
Matendo ya kishetani, Nyie mwayakaushia,
Kilio cha Albino, Hivi kweli tunajali?

Twendeni makanisani, Tuombe huku twalia,
Twendeni misikitini, Tuzisome kali dua,
Mungu na awalaani, Motoni aje watia,
Kilio cha Albino, Hivi kweli tunajali?  

Amiri wa Kulanteni, Beti umezipatia,       [Mutabazi Muta Mutabe]
Ujumbe zimesheheni, Saluti nakupigia,
Ni qadar ya manani, Si hali walonunua,
Kilio cha Albino, Sioni kama twajali.

Tungeingia vitani, Madhubuti pigania,
Twaishia viririni, Badae twapuuzia,
Mungu tumjibu nini, Siku ikishawadia,
Kilio cha Albino, Sioni kama twajali.

Twakomaa vijiweni, Mpira kuongelea,
Twaingia huzunini, Mechi tukijikosea,
Albino mdomoni, Moyoni twajipetea,
Kilio cha Albino, Sioni kama twajali.

Siishie facebukuni, Makali kuoneshea,
Tuingie mitaani, Watu kuhamasishia,
Aridhia Rahmani, Haki tukipigania,
Kilio cha Albino, Sioni kama twajali.

Simanzi tele moyoni, Binadamu kuuana,     [Albert Kissima]
Tumekuwa hayawani, Rabuka tumemkana,
Utu u wapi jamani, Tunusuru maulana,
Kilio cha Albino, Hivi kweli tunajali?

Ni ajabu duniani, Ugonjwa kuwa ni dili,
Kisa hii melanini, Binadamu kawa mali,
Potofu hii imani, Tupinge kwa kila hali,
Kilio cha Albino, Hivi kweli tunajali?

Kwa panga wanawakata, Albino wakiwa hai,
Mateso wanayopata, Nani ambaye halii?,
Dhoruba itawakuta, Kamwe habaki adui,
Kilio cha Albino, Hivi kweli tunajali?

Viungo vya binadamu, Kutolewa akiwa hai,
Kwa mapanga sina hamu, Kuvumilia haifai,
Na kamwe hayatadumu, Wauaji mabedui,
Kilio cha Albino, Hivi kweli tunajali?

Hali hii hadi lini, Tunaweza kukabili,
Kwa pamoja tulaani, Sote na tuwe wakali,
Tuwaweke hadharani, Wauaji mafedhuli,
Kilio cha Albino, Hivi kweli tunajali?

Baraka wa Cosimasi, Albino wa Sumbawanga,
Mungu akupe wepesi, Na azidi kukuchunga,
Upone kwa kasi, Akulinde na majanga,
Kilio cha Albino, Hivi kweli tunajali?

Ulale pema Yohana, Alubino wa Geita,
Hakupenda Maulana, Madhila yalokukuta,
Tunamuomba rabana, Wengine kutowakuta,
Kilio cha Albino, Hivi kweli tunajali?

Dola chukua hatua, Madhila kuyamaliza,
Raia tukiamua, Kukomesha tunaweza,
Ndugu zetu wanalia, Ni sharti kuwatuliza,
Kilio cha Albino, Hivi kweli tunajali?          

Shairi hili limeandaliwa na Amir, Ashiru na Albert.

Comments

Amos Msengi said…
Nadhani kunayo haja ya kutubu mbele za Mungu maana tumekosea sana kuwafanya ndugu zetu albino waone dunia kama sio kwao, sizani kama ni accident kwao kuzaliwa katika dunia hii.

Mungu tusamehe wote.
May 14, 2015 at 1:02 PM
Amos Msengi said…
Kisima mambo yako vipi? Uko bize Siku hizi ndio kusema kitabu kimebana sana?

Nakusalimu sana.
June 13, 2015 at 4:03 PM
Post a Comment

Popular posts from this blog

Mambo Makuu Manne ya Kuzingatia ili Kufanya Upimaji Endelevu Wenye Tija

Image
Picha: Blogger. Upimaji endelevu wa mwanafunzi ndio namna pekee ya kutoa taarifa za maendeleo ya ujifunzaji wa mwanafunzi katika kufikia malengo ya ujifunzaji yaliyokusudiwa kwake. Kwa hiyo, upimaji endelevu ni shuhguli ya msingi mno ya kuzingatiwa na mwalimu na wanafunzi.  Upimaji endelevu siyo shughuli ya mwalimu peke yake. Ni mchakato wa pamoja kati ya mwalimu na manafunzi. Hii ni kusema kuwa, upimaji endelevu ni sehemu ya ujifunzaji wa mwanafunzi na ufundishaji wa mwalimu. Ikiwa tunahitaji kuona upimaji wenye tija, basi kila mmoja ni lazima atimize wajibu wake kwa kushirikiana. NWEA katika chapisho lao la mwaka 2016 linaloelezea mambo makuu manne ya kuzingatia ili kuleta ufanisi kwenye upimaji endelevu, wanaeleza kuwa upimaji endelevu   ni mchakato wa pamoja kati ya mwalimu na wanafunzi wa kukusanya ushahidi wa ujifunzaji wa wanafunzi kwa lengo la kuboresha kile kinachoendelea darasani, kwa maana ya mchakato wa ujifunzaji wa wanafunzi.   Ili...
Read more

Mambo Muhimu ya Kuzingatia Katika Kuboresha na Kuongeza Ufanisi wa Shule.

Image
Umbali kati ya shule na waishipo wanafunzi, hususani kwa shule za kutwa, umebainishwa na watafiti wa elimu kuwa unaathiri masomo ya mwanafunzi. Picha kutoka Fullshangwe Blog . Imetumiwa bila ruhusa. Kama nilivyodokeza katika makala iliyotangulia, makala hii inajadili mambo kadhaa ya msingi ya kuzingatia ili kuboresha na kuongeza ufanisi wa shule, hususani za msingi na sekondari. Mambo haya ni matokeo ya tafiti mbalimbali za masuala ya uboreshaji na ufanisi wa shule. Ubora wa elimu Tanzania umeendelea kushuka siku hadi siku, na mikakati kadhaa ikiwamo ya matokeo makubwa sasa imeanzishwa katika kukabiliana na changamoto hii.. Harakati yoyote ya kuboresha ufanisi na ubora wa shule hauna budi kuzingatia mambo kadhaa yakiwemo haya takayoyajadili hivi punde kwa mujibu wa tafiti mbalimbali za kielimu. Uongozi bora Tafiti za masuala ya ufanisi wa shule zinaonesha kuwa, wakuu wa shule wamekuwa kiini cha mafanikio ya shule.   Tafiti hizi zinaonesha kuwa, ubora wao hufikiwa pale ...
Read more

Kubadilika kwa Mitaala: Walimu na Wanafunzi Wabadilike kwa Namna Gani?

Image
Kila mwanafunzi anajituma wakati wa kujifunza katika harakati za kufikia malengo yao ya ujifunzaji. Picha: Mwandishi wa makala Kama mnakumbuka, kati ya mwaka 2005 na  2007 yalitokea mabadiliko ya mitaala, hususani kwa shule za msingi, sekondari na vyuo vya Ualimu. Kulikuwa na msemo uliovuma sana wa "muhamo wa ruwaza" au "paradigm shift" kwa kiingereza. Ruwaza ni mfumo au imani inayomuwezesha mtu kutekeleza jambo fulani kulingana na matakwa na taratibu fulani zinazofahamika. Kwenye ufundishaji, iliaminika kuwa mitaala yetu ilikuwa ya mfumo unaomuona mwalimu kama chanzo cha maarifa na mwanafunzi kama pipa linalosubiri kujazwa tu maarifa. Mitaala mipya inaaminika kuwa ya ruwaza tofauti, ndio maana mabadiliko haya yakaitwa ya kuhama kwa ruwaza. Namna mitaala ilivyoandikwa na namna ya kuitekeleza ni miongoni mwa mabadiliko haya. Kwa mfano, mabadiliko haya yalipelekea maandalio ya masomo yawe na kipengele cha upimaji kwa kila hatua ya somo. Pia, zimependekezw...
Read more